05.12.2017
İsmayıllı Regional Mədəniyyət və Turizm İdarəsinin tabeliyində fəaliyyət göstərən Şamaxı şəhər İncəsənət Təhsili Mərkəzinin müəllim və şagird kollektivi xalqımızın böyük bəstəkarı Fikrət Əmirovun anadan olmasının 95 illik yubileyi münasibəti ilə tədbir təşkil etdi.
Tədbir, Azərbaycan professional bəstəkarlıq məktəbinin korifeylərindən biri olan Fikrət Əmirov haqqında qısametrajlı filmin nümayişi ilə başlandı. Sonra Mərkəzin fortepiano şöbəsinin müəllimi Vüsalə Eyvazova dahi bəstəkarın zəngin yaradıcılığından söz açaraq, Onun musiqimizin inkişafında necə yeni mərhələ açması, musiqimizi dünya miqyasında tanıtması, əsərlərinin böyük konsert salaonlarında səsləndirilməsi haqqında geniş çıxış etdi.
Tədbirin bədii hissəsində məktəbin şagirdləri dahi bəstəkarın Azərbaycan mədəni irsinin qiymətli incilərindən sayılan əsərlərini məharətlə ifa etdilər.
Sonda məktəbin direktoru hər kəsə gəldiyi üçün öz təşəkkürlərini bildirdi və qeyd etdi ki, Fikrət Əmirovun əsərləri xalqımızın yaddaşına əbədi həkk olunmuşdur və bu musiqiyə məhəbbət xalqımızın qəlbində əbədi yaşayacaqdır.